Ka disa dit\u00eb, q\u00eb faqet e gazetave, por sidomos faqet zyrtare t\u00eb disa institucioneve kushtetuese jan\u00eb mbushur me transkriptet e fjal\u00ebs s\u00eb zonj\u00ebs Klinton mbajtur disa dit\u00eb m\u00eb par\u00eb me rastin e 100 vjetorit t\u00eb shtetit shqiptar, si dhe me perifrazimet e rastit, me p\u00ebrshtatjet e kuptimeve t\u00eb asaj fjale, e mund\u00ebsisht me shp\u00ebrdorimet aspak fisnike t\u00eb tyre, si\u00e7 dhe pritej. Zonja Klinton foli p\u00ebr nj\u00eb s\u00ebr\u00eb \u00e7\u00ebshtjesh, nga pozitat e diplomates, me gjuh\u00ebn politikisht korrekte q\u00eb i takon nj\u00eb zonje t\u00eb lart\u00eb t\u00eb huaj, n\u00eb nj\u00eb mision rajonal. Ajo p\u00ebrmendi nj\u00eb s\u00ebr\u00eb momentesh ky\u00e7e t\u00eb historis\u00eb s\u00eb Shqip\u00ebris\u00eb, t\u00eb marr\u00ebdh\u00ebnieve t\u00eb mira mes dy shteteve (e jo mes grupimeve t\u00eb individ\u00ebve n\u00eb pushtet n\u00eb vendet p\u00ebrkat\u00ebse), duke folur edhe p\u00ebr kontributin e shtetit t\u00eb saj n\u00eb favor t\u00eb Shqip\u00ebris\u00eb. Zonja preku gjithashtu nj\u00eb s\u00ebr\u00eb problemesh shqiptare, t\u00eb p\u00ebrmbledhura n\u00eb formul\u00ebn e \u201cintegrimit\u201d, e t\u00eb zb\u00ebrthyera n\u00eb termat e zgjedhjeve t\u00eb gjith\u00ebkontestuara, aq sa t\u00eb nevojiten ende mbik\u00ebqyr\u00ebs t\u00eb huaj p\u00ebr t\u2019u ratifikuar vlefshm\u00ebrin\u00eb eventualisht (prej nga dhe ftesa entuziaste qeveritare p\u00ebr prezenc\u00ebn e huaj, meq\u00eb asgj\u00eb nuk \u00ebsht\u00eb m\u00eb e rast\u00ebsishme); t\u00eb sjelljes q\u00eb duhet t\u00eb mbajn\u00eb aktor\u00ebt gjat\u00eb procesit zgjedhor, para dhe pas tij, duke ilustruar situat\u00ebn, p\u00ebr t\u00eb gjith\u00eb t\u00eb pav\u00ebmendshmit, me eksperienc\u00ebn e saj personale; p\u00ebr rolin q\u00eb duhet t\u00eb ken\u00eb institucionet dhe respektimin e jo p\u00ebrjashtimin, margjinalizimin apo denigrimin e tyre; p\u00ebr p\u00ebrballjen e qeveris\u00eb me qytetar\u00ebt, legjitimuesit e v\u00ebrtet\u00eb t\u00eb kujtdo i drejtohet turm\u00ebs nga pozitat e poltron\u00ebs pushtetare, e p\u00ebr p\u00ebrgjegjshm\u00ebrin\u00eb ndaj tyre, n\u00eb form\u00ebn e llogaridh\u00ebnies, kur pushteti d\u00ebshton n\u00eb misionin p\u00ebr t\u00eb cilin \u00ebsht\u00eb votuar, apo n\u00eb komunikimin me ta (kujtojm\u00eb me k\u00ebt\u00eb rast vdekjen e dit\u00ebs s\u00eb nes\u00ebrme t\u00eb vizit\u00ebs, t\u00eb protestuesit Lirak Bejko, t\u00eb cilit nuk iu la asnj\u00eb mund\u00ebsi tjet\u00ebr p\u00ebr t\u00eb shprehur shqet\u00ebsimin e tij, p\u00ebrve\u00e7se p\u00ebrmes flak\u00ebve vdekjeprur\u00ebse). Zonja p\u00ebrmendi gjithashtu \u00e7\u00ebshtjet e korrupsionit, me t\u00eb cilat ne shqiptar\u00ebt jemi familjarizuar me koh\u00eb, edhe pse her\u00eb pas her\u00eb protestojm\u00eb duke rrezikuar plumbin falas nga garda qeveritare.<\/p>\n
Zonja foli, p\u00ebrsh\u00ebndeti, e u largua, duke l\u00ebn\u00eb pas qeverin\u00eb e t\u00eb varurit prej saj t\u00eb p\u00ebrpunojn\u00eb variantet e tyre t\u00eb mesazhit. Zonja foli, e nd\u00ebrkoh\u00eb nga instancat qeveritare, si dhe t\u00eb kujt p\u00ebrpiqet me \u00e7do kusht t\u00eb mbetet n\u00ebn hijen e t\u00eb nj\u00ebjt\u00ebs qeveri, vijoi e vijon aktualisht, propaganda e nisur vite m\u00eb par\u00eb, pik\u00ebrisht aty ku kish ngecur p\u00ebr shkak t\u00eb 3-4 or\u00ebshit t\u00eb pranis\u00eb s\u00eb zonj\u00ebs Klinton. Zonja foli, por qeveria e t\u00eb varurit prej saj nuk duket t\u00eb ken\u00eb kuptuar gj\u00eb as k\u00ebt\u00eb her\u00eb, edhe pse mesazhi u p\u00ebrcoll qart\u00eb e n\u00eb t\u00eb dy gjuh\u00ebt kryesore t\u00eb diplomacis\u00eb e politik\u00eb-b\u00ebrjes shqiptare. Ndoshta diplomacia nuk \u00ebsht\u00eb pik\u00eb e fort\u00eb e k\u00ebsaj qeverie, e as mir\u00eb-qeverisja. Ndoshta teatri i absurdit q\u00eb nuk na kursehet n\u00eb asnj\u00eb rast, i ka z\u00ebn\u00eb vendin \u00e7do ndjeshm\u00ebrie sociale e politike q\u00eb duhej t\u00eb reflektonte \u00e7do qeveri e denj\u00eb p\u00ebr t\u2019u quajtur e till\u00eb.<\/p>\n
N\u00eb fakt nga qeveria vjen deklarata se k\u00ebt\u00eb her\u00eb do t\u00eb kemi zgjedhje t\u00eb mira e t\u00eb lira (dikur nj\u00ebri shiste \u201ckikvip me kvip t\u00eb miva t\u00eb liva\u201d n\u00eb shkoll\u00eb), por nuk \u00ebsht\u00eb e qart\u00eb n\u00ebse ky q\u00ebndrim \u00ebsht\u00eb rezultat i reflektimit p\u00ebr t\u00eb gjitha shkeljet e deritanishme t\u00eb k\u00ebsaj qeverie, apo sepse ia ka k\u00ebrkuar Europa, apo thjesht p\u00ebr t\u00eb k\u00ebnaqur me nj\u00eb fjal\u00eb t\u00eb mir\u00eb zonj\u00ebn Klinton (meqen\u00ebse qeveria me shqiptar\u00ebt prej koh\u00ebsh nuk mban m\u00eb q\u00ebndrim). Berisha zotohet personalisht, se k\u00ebto do t\u00eb jen\u00eb zgjedhjet m\u00eb t\u00eb mira e m\u00eb t\u00eb lira (si n\u00eb pazar), duke e garantuar zonj\u00ebn, por jo ne, e duke eklipsuar sakaq nj\u00eb s\u00ebr\u00eb institucionesh t\u00eb ngritura posa\u00e7\u00ebrisht p\u00ebr k\u00ebt\u00eb q\u00ebllim t\u00eb ri kryeministror, pra p\u00ebr t\u00eb administruar drejt e n\u00eb respekt t\u00eb ligjit procesin zgjedhor. P\u00ebr t\u00eb mos folur p\u00ebr serin\u00eb e ligjeve q\u00eb disiplinojn\u00eb procesin zgjedhor, ato q\u00eb ndryshojn\u00eb pas \u00e7do procesi me t\u00eb nj\u00ebjtin premtim e entuziaz\u00ebm, e q\u00eb na jan\u00eb aprovuar rregullisht n\u00ebp\u00ebr raportet e BE-s\u00eb, p\u00ebr standardin e lart\u00eb, por jo rezultatet, q\u00eb duket se reflektojn\u00eb. Gj\u00eb q\u00eb e b\u00ebn t\u00eb paqart\u00eb tagrin me t\u00eb cilin Berisha del personalisht garant i di\u00e7kaje q\u00eb e gjith\u00eb bota e civilizuar t\u00eb cil\u00ebs ai i apelohet n\u00eb tym, ia ka besuar sistemit, organeve, rregullave t\u00eb posa\u00e7me, si dhe tradit\u00ebs, kultur\u00ebs e mentalitetit demokratik. Ndoshta sepse Berisha e t\u00eb varurit prej tij, kan\u00eb eksperienc\u00eb t\u00eb pasur n\u00eb ndikimin e fatit t\u00eb zgjedhjeve dhe e din\u00eb se p\u00ebr \u00e7far\u00eb flasin, kur garantojn\u00eb me fjal\u00eb burrash. Ndoshta sepse mistika dhe thashethemnaja institucionale kan\u00eb funksionuar p\u00ebrpikm\u00ebrisht, krahasuar me t\u00eb tjera instrumente t\u00eb demokracis\u00eb s\u00eb zbatuar n\u00eb shtetin e zonj\u00ebs Klinton e t\u00eb t\u00eb ngjashm\u00ebve t\u00eb vet.<\/p>\n
P\u00ebr m\u00eb tep\u00ebr, duket se zonja Klinton e paska frym\u00ebzuar Berish\u00ebn q\u00eb t\u00eb mendoj\u00eb m\u00eb n\u00eb fund p\u00ebr interesat komb\u00ebtare, e p\u00ebr nevoj\u00ebn e bashk\u00ebpunimit institucional, kryesisht me opozit\u00ebn, frym\u00ebzime q\u00eb ting\u00ebllojn\u00eb si ato t\u00eb her\u00ebs s\u00eb par\u00eb, t\u00eb vitit zero, t\u00eb t\u00eb sapo r\u00ebn\u00ebve nga ret\u00eb. Qeveria po sh\u00ebrben publikisht termat e bashk\u00ebpunimit e t\u00eb respektit institucional, n\u00eb nj\u00eb koh\u00eb kur memoria kolektive shqiptare i ka m\u00eb se t\u00eb fresk\u00ebta shembujt e shp\u00ebrdorimit t\u00eb pushtetit n\u00ebp\u00ebrmjet personalizimit p\u00ebr q\u00ebllime t\u00eb kushedi\u00e7far\u00ebshme. M\u00eb vijn\u00eb n\u00eb mendje n\u00eb k\u00ebt\u00eb kuptim, em\u00ebrtimet q\u00eb iu dhan\u00eb disa titullar\u00ebve t\u00eb lart\u00eb shtet\u00ebror\u00eb, t\u00eb nes\u00ebrmen e 21 janarit, menj\u00ebher\u00eb pas urdhrit dhe vrasjes s\u00eb qytetar\u00ebve t\u00eb mbledhur n\u00eb protest\u00eb kundra korrupsionit shtet\u00ebror (dim\u00eb q\u00eb ushtarak\u00ebt q\u00ebllojn\u00eb me urdh\u00ebr). E kam fjal\u00ebn p\u00ebr em\u00ebrtimet e llojit bulevardesk, sipas nj\u00eb regjistri qeveritar t\u00eb fjal\u00ebs, aspak integrues n\u00eb BE e n\u00eb NATO. Jan\u00eb t\u00eb fresk\u00ebta t\u00eb gjitha presionet e ushtruara nga qeveria mbi institucionet e pavarura, por asnj\u00eb gjurm\u00eb nga bashk\u00ebpunimi q\u00eb k\u00ebrkoi zonja Klinton e q\u00eb mall\u00ebngjeu t\u00eb k\u00ebtejshmit. Jan\u00eb t\u00eb shumt\u00eb shembujt e keqadministrimit t\u00eb pushtetit, nga 21 janari e tutje, nd\u00ebrkoh\u00eb q\u00eb asgj\u00eb nuk na pengon t\u00eb konsolidojm\u00eb kujtes\u00ebn me shembuj nga G\u00ebrdeci 2008 apo t\u00eb famshmet vite \u201990. T\u00eb mall\u00ebngjyerit e sot\u00ebm nga fjal\u00ebt e zonj\u00ebs Klinton, pat\u00ebn gjith\u00eb koh\u00ebn n\u00eb dispozicion (plot dy mandate parlamentare) p\u00ebr t\u00eb treguar konceptin q\u00eb kan\u00eb p\u00ebr institucionet dhe vendin q\u00eb u \u00ebsht\u00eb dh\u00ebn\u00eb me Kushtetut\u00eb. Koh\u00eb q\u00eb ata nuk humb\u00ebn, duke na ofruar situata t\u00eb abuzimit me pushtetin gjithfar\u00ebsoj. Mjafton t\u00eb kujtojm\u00eb abuzimin me protokollin shtet\u00ebror t\u00eb disa muajve m\u00eb par\u00eb kur u vendos se Presidenti i Republik\u00ebs n\u00eb ikje, institucioni m\u00eb i lart\u00eb p\u00ebrfaq\u00ebsues i vendit, nuk duhej t\u2019u fliste shtetasve t\u00eb vet, si\u00e7 e k\u00ebrkonte tradita. Apo protokollin e improvizuar t\u00eb ndonj\u00eb dite m\u00eb par\u00eb, ku asistuam n\u00eb shembullin e radh\u00ebs t\u00eb konceptit bashk\u00ebpunues sipas Berish\u00ebs dhe t\u00eb varurve prej tij, me rastin e vizit\u00ebs madhore t\u00eb zonj\u00ebs Klinton, q\u00eb reflektoi s\u00ebrish vullnetin e p\u00ebrjashtimit t\u00eb institucioneve t\u00eb pad\u00ebshiruara nga partia n\u00eb pushtet. I referohem kthimit n\u00eb minut\u00ebn e fundit t\u00eb Prokurores s\u00eb P\u00ebrgjithshme nga Azia e larg\u00ebt p\u00ebr t\u00eb qen\u00eb e pranishme n\u00eb pritjen e zonj\u00ebs Klinton, ashtu si dhe p\u00ebrfshirjen n\u00eb minut\u00ebn e fundit t\u00eb ish \u2013 Presidentit (atij q\u00eb qeveria e pa t\u00eb arsyeshme t\u2019i hiqte fjal\u00ebn), n\u00eb t\u00eb nj\u00ebjt\u00ebn pritje. Dhe jo fal\u00eb reflektimit mbi gaf\u00ebn nga instancat qeveritare, por sepse k\u00ebshtu e pa t\u00eb arsyeshme nj\u00eb tjet\u00ebr autoritet, m\u00eb i arsyesh\u00ebm e i rrahur me pun\u00ebt e qeverisjes, Ambasada Amerikane. Edhe nj\u00eb her\u00eb, dinjitetin e t\u00eb nes\u00ebrmes s\u00eb ngjarjeve t\u00eb m\u00ebdha na e shp\u00ebtuan (dhe p\u00ebr k\u00ebt\u00eb faleminderit) ata, nd\u00ebrkomb\u00ebtar\u00ebt, autoritetet tona jasht\u00ebshtet\u00ebrore.<\/p>\n
U desh\u00ebn vet\u00ebm 3-4 or\u00eb nga jeta e nj\u00eb gruaje amerikane t\u00eb lart\u00eb, p\u00ebr t\u00eb zhveshur pseudo-solemnitetin e impenjuar qeveritar nga varaku i propagand\u00ebs s\u00eb vjet\u00ebr partiake. Nd\u00ebrkoh\u00eb q\u00eb sot, trajektorja e k\u00ebsaj propagande qartazi i \u00ebsht\u00eb rikthyer k\u00ebng\u00ebs s\u00eb vjet\u00ebr, duke sh\u00ebrbyer avazin e konsensusit t\u00eb opozit\u00ebs, 3 ligjet magjike (si tri fijet e flokut t\u00eb art\u00eb), dhe garancin\u00eb personale t\u00eb Berish\u00ebs se k\u00ebt\u00eb her\u00eb e ka seriozisht me zgjedhje t\u00eb lira e t\u00eb mira. Ve\u00e7se k\u00ebt\u00eb her\u00eb, ai po garanton zonj\u00ebn Klinton, nj\u00eb jo shtetase shqiptare pa t\u00eb drejt\u00eb vote, nd\u00ebr t\u00eb tjera.<\/p>\n
Sepse ai garanton, dhe garanton andej tashm\u00eb.